Համագործակցության համաձայնություն՝ ՄԱԿ-ի Բնակչության հիմնադրամի հայաստանյան գրասենյակի հետ
Ապրիլի 27-ին հանդիպում են ունեցել ՄԱԿ-ի Բնակչության հիմնադրամի հայաստանյան գրասենյակի ղեկավար Ծովինար Հարությունյանը և «Կետ 33» կազմակերպության նախագահ Աստղիկ Կարապետյանը։ Հանդիպմանը ներկա էին նաև ՄԱԿ-ի Բնակչության հիմնադրամի հայաստանյան գրասենյակի սեռական և վերարտադրողական առողջության ծրագրերի ղեկավար Նարինե Բեգլարյանը և ժողովրդագրական ծրագրերի ղեկավար Աննա Հովհաննիսյանը, «Կետ 33» կազմակերpության իրավաբան, փաստաբան Գևորգ Սլոյանը, հանրային կապերի պատասխանատու Շուշան Շատիկյանը։
Հանդիպման ժամանակ Աստղիկ Կարապետյանը ներկայացրեց «Հարմարավետ միջավայր վաղ մայրության շրջանում գտնվող կանանց համար» ծրագիրը, որն իրականացվում է Եվրոպական միության ֆինանսավորմամբ` «Մարդը կարիքի մեջ» հասարակական կազմակերպության «Քաղաքացիական հասարակության դերակատարները՝ որպես փոփոխությունների կրողներ Հարավային Կովկասում և Մոլդովայում» ծրագրի շրջանակում:
Քննարկվեցին համագործակցության վերաբերող հարցեր։ Հանդիպման արդյունքում ձեռքբերվեց ընտանիքամետ միջավայրի քաղաքականությունների մշակմանն ու իրականացմանն ուղղված համագործակցության պայմանավորվածություն։
