«Ընտանիքամետ գործատու» էսսեների և բլոգային նյութերի մրցույթ
«Կետ 33» տեղեկատվական, իրավապաշտպան հասարակական կազմակերպությունը, Ֆրիդրիխ Էբերտ հիմնադրամի հայաստանյան մասնաճյուղի հետ համագործակցությամբ, հայտարարում է «Ընտանիքամետ գործատու» էսսեների և բլոգային նյութերի մրցույթ։
Մրցույթին հայտեր կարող են ներկայացնել բլոգերները, անկախ լրագրողները և ցանկացած ոք, ով կցանկանա պատմել իր գործատուի և աշխատավայրի մասին։
Բլոգային նյութերը (գրառումներ, տեսանյութեր, վիզուալներ) պետք է պատմեն, թե ինչ է ընտանիքամետ գործատուն և աշխատավայրը և պետք է հրապարակված լինեն 2025 թվականի հունվարի 1-ից մինչև նոյեմբերի 5-ն ընկած ժամանակահատվածում։
Այս նյութերը գնահատվելու են հետևյալ չափանիշներով՝ ա) թեմայի համապատասխանություն, բ) տեղեկատվության հաղորդելու հետևյալ սկզբունքների պահպանում՝ ճշգրտություն, անաչառություն, բազմակողմանիություն, մարդուն չվնասելու զգուշավորություն, գ) նյութի կառուցվածք և մուլտիմեդիա բաղադրիչների կիրառում, դ) գովազդ, կոմերցիոն հայտարարություններ չպարունակի։
Էսսեների դեպքում ակնկալվում է ստանալ պատմություններ այն աշխատողներից, ովքեր առնվազն մեկ տարի աշխատում են այն գործատու մոտ, որի մասին պատմելու են և որին ներկայացնելու են որպես ընտանիքամետ։ Էսսեների նախապես հրապարակված լինելու վերաբերյալ պահանջ չկա։ Այս նյութերը կարող են հրապարակվել «Կետ 33» կազմակերպության կայքում և սոցիալական մեդիայի հարթակներում։ Ստեղծագործական նյութերը գնահատվելու են հետևյալ չափանիշներով՝ ա) թեմայի համապատասխանություն, բ) թեմայի առավելագույնս հստակ և ընկալելի ներկայացում։
Մրցանակներ՝
Բլոգային նյութի անվանակարգ` 100 000 ՀՀ դրամ (ներառյալ հարկերը)։
Էսսեի անվանակարգում՝ 50 000 ՀՀ դրամ (ներառյալ հարկերը)։
Նախատեսվում են նաև հատուկ մրցանակներ։
Մրցույթին դիմելու վերջնաժամկետը 2025թ. նոյեմբերի 5-ն է։
Մրցույթին մասնակցելու համար անհրաժեշտ է [email protected] հասցեին ուղարկել նամակ, որը պետք է պարունակի՝ հեղինակի անուն-ազգանունը, հեռախոսահամարը և էլեկտրոնային փոստի հասցեն, լրագրողական նյութի կամ էսսեի գործող հղումը, իսկ հրապարակված չլինելու դեպքում՝ նյութի ֆայլը։
Պահանջներին չբավարարող հայտերը չեն դիտարկվելու։
